إزاي مش شايف إن أنت حمار؟!

يا حرقة قلبي عليك يا ابني

دا أنا قلت إن أنت اللي هتبني

وعلى موجة الدنيا تركبني

غصبا عنك كدا بتسيبني

دول قالو خلاص إنك عالراس

و أخيرا هتعيش زي الناس

وعدوني و قالو خلاص لا مساس

إزاي بقى برجولهم تنداس

دانا حلمي أنت اللي بنيته

و رباطي بإديك  فكيته

و طموحي في قلبك لقى بيته

و قلبي الكافر أنت هديته

تبقى مقتول وكمان متهوم

أنت الشاتم مش المشتوم

وكمان في عزاك منتاش معزوم

ماهو أنت عميل واكل مكتوم

ادولك  عيش  ... بتقول  ليه كمان؟؟

لو قلت كمان ... يحصل قلبان

هتعيش جعان و تموت عشمان

و كمان تطلع  أنت الغلطان

ياللي حاكم ولا على باله

بص و شوف الشارع ماله

عجلة مفسيه اديتهاله

يوصل بيها لكل آماله

إزاي بتقول أنت حاميها

و شوارعها فيها إلي ما فيها

و كراسي موسيقية قضيها

حتى العجلة بتفسيها

لأ خلاص ولا عاد واكل

الحق لسه متاكل

شلت هياكل جبت هياكل

دا انت بقى اللي غاوي مشاكل

لسه بتلعب قط وفار

لا القط قط ولا الفار فار

حاول كمان تلعب بالنار

إزاي مش شايف إن أنت حمار؟؟؟

----

بسمة الدق

 كتبتها من نوفمبر 2011 أيام حكم العسكر .. كل ما أقول خلاص راح زمن الكلام ده ييجي وجع قلب جديد :'(

اللهم ارحم قلوب أثقلتها الأحزان  :'(