أفراح بلدنا

كالعادة.. برضه هبتدي بكلام علمي...

تعريف الفرح حسب موسوعة “بسموبيديا":  موسم يتزاوج فيه شخصين من فصيلة الإنسان وتتجمهر فيه جموع أخري من نفس الفصيلة غالبا. ومن الملاحظ في مثل تلك المواسم حدوث بعد التصرفات الغريبة التي لم يستطيع العلماء معرفة أسبابها حتى الأن!

المكونات الرئيسية لأي فرح:
عريس وعروسة .. بديهي يعني
معازيم.. شر لابد منه
على الأقل 2 أو 3 "طنط حشرية" أو "أونكل حشري"
عيال صغيرة رخمة بيلزقو في العريس والعروسة وينطو في كل الصور
حد يقعد يبحلقلك طول الفرح

البوفيه والأكل:

الأكل بقى مش هتكلم عليه كتير. انتو فاهمين كويس طبعا الماراثون اللي بيحصل.

أول ما البوفيه يتفتح .. تشوف المنظر ده :

البقاء للأقوى!

وإنتو يا بنات كفاية عليكم المخللات!

من كام يوم شفت واحدة في فرح بتحط بيبسي في ببرونة البيبي بتاعها وتشربهوله!

ليييييييه!

أنا طبعا كنت في حالة إنهيار! ولحظة وكنت هصرخ فيها: "بيبسي يا معفنين!"

بس الحمد لله … أخدت بق بيبسي وانبهرت وأنا ساكته!

الدي جي والأغاني:

هو ليه مينفعش الدي جي في الأفراح يشغل أغاني عمرو دياب وشيرين وكده؟ لازم مهرجانات وأغاني شعبي!

والدي جي لازم يحط التاتش بتاعته في كام أغنية كده .. خاصة الأجنبي. اتفرجو على أغنية الرقص السلو -- : Slow Dance 

“How Do I Live Without You”

Michael Bolton’s “Hello”

هو مش ده كان فرح برضه؟!

طيب معندكش أغاني كئيبة عن كده شوية؟

عندك قتل؟

ماااااااااا علينا!

اتفرج بقى أول ماتشتغل أغنية شعبي في الفرح .. تحس إن فيه غزو حصل للقاعة!

مش هي دي الناس اللي جيت معاها على فكرة!

تلاقي الناس كلها قامت تتنطط زي مايكون حد رش عليهم بودرة العفريت!

المعازيم:

اللي الكل بيشترك فيه في أي فرح هو المعايبة على المكان والعروسة والعريس واللبس والأكل والقاعة والناس والعيشة وإللي عايشينها !!

يعني العريس يبقى دافع قد كده وغالبا راهن كليته وودنه اليمين .. ويطلع في الأخر حسب رأي المعازيم اتجوز واحدة حولة وشبه إسماعيل ياسين!

والعروسة تبقى عاملة ريجيم بقالها شهرين ودورت على الفستان لحد ماطلع عينها مشاوير وبلاوي .. وبرضه حسب رأي المعازيم تطلع وقعت في سلومة الأقرع!

أو لو بيحبوها شوية .. هيقولو على العريس حليوه كده:

في أفراحنا .. المعازيم دول فعلا بجد بجد .... ناس طيبين قوي يا خال!

بس سيبك أنت … إفرح يا شعب!

-----

بسمة الدق