إزاي بيقولو عليكي قمر؟!

إزاي بيقولو عليكي قمر؟!
طب دانتي فيكي كل العبر
نايمين في مر
قايمين في مر
دا الأكل بدلناه بصبر!


مفروض أكون أنا في حماكي
بس إنتي مش فارقة معاكي
إني أعيش فيكي قلبي باكي
فاكرانا إيه؟
دا إحنا بشر !

حبك ده لعنة عليا كانت
هكسرها  لازم ..
خلاص دي هانت
فقر وزحمة وضلمة بانت
دي حتى غطت القمر!

غمضت عيني
ومشيت بعيد
ايوه هسيبك...
محناش عبيد !
ماشفت فيكي يوم سعيد
ده معادش فيكي إلا شر!

مشيت!  
ياجسمي ليه تقيل؟!
ياعين بتبكي في يوم جميل؟!
ياقلب مالك .. ليه عليل؟!
ده البعد عنها شيء يسر !

هما يدوبك خطوتين
نسيت قوام وجع السنين
كل اللي حاسه ليكي حنين
أمشي وأسيبها؟؟!!
عارفين دي مين؟؟!!
شكلي بحبك
ومفيش مفر!

وارجع وأقول رغم العبر
برضه يا بلدي شايفك قمر!

-----
بسمة الدق